Tuesday, November 2, 2010

ડણકતી ડૉલી,B.B.S.4

ડણકતી ડૉલી,B.B.S.4

" ડણકતા હોય તે બધા કાંઈ શેર નથી હોતા..!!
 નકલી ભડાકા કરેથી, કોઈ  ઢેર નથી થાતા..!!"


ડણકવું = સિંહ ગર્જના.
(હી..હી..હી..હી..!!)

===========

પ્રિય મિત્રો,

દિવાળી નજીકમાં છે, બધીજ સોસાયટીઓમાં, દરેક બહેનો ઘરમાંથી નકામી ચીજવસ્તુઓ, ભંગારવાળાઓને હોંશે-હોંશે, કોઈજ રકઝક કર્યા વગર, પધરાવી રહ્યા હતા.  સોસાયટીઓમાં, નાની નાની વાતમાં, બહેનો કબજાની અને ભાઈઓ પહેરણની બાંયો ચઢાવીને પરસ્પર લઢવાને બદલે, બધાજ  ઘરની  બુધીબહેનો અને બુધીયાભાઈઓ માળીયાં સાફ કરવામાં પડ્યા હોવાથી,નિરવ શાંતિ પ્રવર્તતી હતી.

ઉપરાંત, ટીવીના સુંદર કાર્યક્રમો સાથે, આપણી સાંજ પણ કેવી સોહામણી લાગતી હતી..!!

મને તો  `કૌન બનેગા કરોડપતિ`માં, અઘરા સવાલોના જવાબ ન આવડતા હોવાથી, માથું ખંજવાળવું અને મગજને ત્રાસ આપવો કે સાસુ વહુની રોજની રામાયણના, બીજા ફાલતુ કાર્યક્રમ જોવા, તેના કરતાં, મગજનો ઉપયોગ કર્યા વગર,  બીગબોસ-૪ માણવાનું  મને વધારે માફક આવતું હતું..!!

પણ, તેવામાં, હે રામ..!! અરે..રે..રે..!! બીગબૉસને આ શું કમત્ય સુઝી તે, મારફાડ ડૉલી બિંન્દ્રાને વાઈલ્ડ કાર્ડ એન્ટ્રી આપી દીધી?

વળી પાછું, ખરેખર `વાઈલ્ડ` શબ્દને સાર્થક કરવાનો હોય તેમ, આ ડૉલી બહેને, પહેલાજ દિવસથી વાઈડ સ્વભાવનો પરચો આપીને, બધાને માનસિક ત્રાસથી ડોલતા-ડગમગતા કરી દીધા.

જરા વિચારો, આદરણીય ડૉલીજી B.B.S.4માં પધાર્યાં, તે પહેલાંનું B.B.S.4, કેટલું રૂપાળું હતું..!!

એ..ય..ને..!! અસ્મિતભાઈ, પોતાની વહાલી દીકરી સારાખાનને કારણ વગર વારંવાર, બાઝી બાઝીને, વહાલ કરતા જણાતા હતા.

અત્યંત શાલીનતાપૂર્વક વર્તતા, આદરણીય શ્રીસમીરભાઈ સોનીભાઈ, જાણે, સોનાના ઘરેણા પર, અત્યંત બારીકાઈથી, અત્યંત કુશળતાપૂર્વક, નકશીકામ કરતા હોય તેમ, પોતાની ઈમેજ પર  નકશીકામ કરીને, અત્યંત મૃદુ અવાજે, સહુની સાથે, પરમાનંદમય જણાતા હતા.

મહાબલી, ખલીભાઈના પક્ષે, ચમચાનું બિરૂદ મળે તેટલી હદે, આપણા બૉડીબિલ્ડર શ્રીરાહુલભાઈ ભટ્ટભાઈ ખુશામત કરતા જણાતા હતા.

સુપરસ્ટાર, બિહારીબાબુ, મનોજભાઈ તિવારીભાઈ પોતાના બિહારની વાતો કરતાં થાકતા નહતા. ઋષાંતભાઈ અને આંચલબહેન એકદમ શાંત જણાતાં હતાં.

દસ્યુસુંદરી, સીમાજી ડાકુ છે અને તે કેવળ ગરદન મરડીને બધાને પતાવી દેતા હતાં, તેમ જાણીને, બીના મલિક સિવાયનાં,બાકીના બધા સદસ્ય તેમનાથી દુર રહેવા પ્રયત્ન કરતા હતા.

આપણાં સિરીયલ્સમાં, અનેક પતિ બદલતાં,.વર્તમાન દ્રૌપદીજી સુશ્રીશ્વેતા તિવારી, મનોજ તિવારીની પત્ની સાથેના મનઃદુખને નિવારવાના ઉપાય દર્શાવતા હતા અને રસોડામાં પણ સર્વેસર્વા હતાં.

ટૂંકમાં, બધું બરાબર, સરસ ચાલતું હતું. આપણી દિવાળી આપણે, ગર્વથી બીગબોસ-૪ માં થતાં અને ત્યારબાદ નવાં થનાર પ્રેમપ્રકરણોની ચર્ચા કરવાનાં ખ્વાબ જોઈ રહ્યા હતા. ત્યાંજ આપણાં સઘળાં સ્વપ્ન, ધૂળમાં મળી ગયાં

હવે તો, થોડા અભાગિયા બુધીયાઓના ઘર સિવાય, બાકીના તમામ ઘરની સફાઈ પૂર્ણતાના આરે છે અને રાત્રીના નવ વાગતાંજ, બધાજ ઘરની બુધીઓ અને બુધીયાઓ, નાહી ધોઈને, કલર્સ ચેનલની બીગબૉસ સિઝન ચાર, નિહાળવા ગોઠવાઈ જાય છે અને, દરેક ઘરમાંથી, એક સાથે, એકસરખી સિંહ ગર્જનાઓ, ત્રાડો સંભળાવા લાગે છે. જોકે, આપણે એટલો સધિયારો લઈ શકીએકે, આ સિંહગર્જનાથી આપણને ભય કે ત્રાસ થવાને બદલે, મનોરંજન સાથે, રમૂજના ભાવ થાય છે.

હું બહુ ચિંતન કરું છુંકે, ડૉલીજી, બધાનું વારંવાર અપમાન કરીને, તોછડાઈ દાખવી, બધાયને ટકાના શું કામ કરે છે? શું તે કોઈ માનસિક રોગથી પીડાય છે? શું તે વધારે પડતી અભિમાની સ્ત્રી છે? શું તેને બાકીના બધા પ્રતિયોગી કરતાં વધારે ફૂટેજ જોઈએ છે? શું ટી.આ.પી વધારવા માટે, તેને બીગબૉસે આમ વર્તવાની શરતે ઍન્ટ્રી આપી છે?  સાલું, કશુંજ સમજાતું નથી..!!

જોકે, ડૉલીના વર્તનથી આપણને કશોજ ફરક પડતો નથી. પરતું મને એટલી ચિંતા જરૂર થાય છેકે, ગુજરાતમાં દિવાળીની કાળીચૌદશની રાતે, ઘણા કુટુંબોમાં, નજીકના ચારરસ્તે, થોડાં ભજીયાઁ અને પાણીનું ગોળ કુંડાળું કરીને, ઘરમાંથી કકળાટ કાઢવાનો રિવાજ છે, તેવો રિવાજ B.B.S.4માં, સુશ્રીશ્વેતાબહેન તિવારીબહેન, જો પાળતાં હોય તો, તેમને ડૉલી નામનો કકળાટ, ઘરમાંથી કાઢવા, રસોડામાં પેસવા દઈને, ભજીયાં બનાવવા દઈને, બીગબોસ હાઉસના નજીકના ચારરસ્તા સુધી જવાની પરમિશન મળશે કે કેમ?

મને લાગે છે, બીગબોસ, આ બાબતે ડૉલીજીની સલાહ લઈનેજ, આગળ વધશે, તેમ અત્યારે તો લાગે છે?

બાકી તો અત્યારે, આદરણીય શ્રીસમીરભાઈ સોનીભાઈ, પોતાની મૃદુતાને ઠેબે ચઢાવી, ઘરેણાનું નકશીકામ પડતું મૂકીને, અડધું અંગ્રેજી, અડધું હીન્દીમાં, ડૉલીનીની ત્રાડો સાથે, કૂતરાની ગાળોનો સામનો કરવાનો, નિષ્ફળ પ્રયત્ન કરતા હોય ત્યારે મને એક  જુની વાર્તા યાદ આવે છે, જેમાં , નદી કિનારે એકસાથે, પાણી પીવા આવેલા સિંહ અને પેલા બીકથી ફફડતા ઘેટાને, સિંહે એમ કહીને ફાડી ખાધું હતુંકે," તેં નહીં તો તારા બાપે મને એઠું પાણી પાયું હશે?"

અને ડાકુરાણી સીમા? હાથ વડે ડોઈ મરડીને, કેટલાય લોકોને પતાવ્યાની ડંફાસો ઠોકતી ડાકુરાણી  સીમા, ડૉલીની એક ત્રાડ સાથેજ, નીચી મૂંડી કરી, બીકણ બિલાડીની માફક, રસોડામાં આમલૅટ બનાવવા પેસી જાય છે.

આપણા શ્રીરાહુલભાઈ ભટ્ટભાઈ,મહાબલી ખલીની ખુશામત કરવાનું પડતું મૂકીને, મહાબલી ડૉલીની ખુશામત કરતા થઈ ગયા છે.

જોકે, ડૉલીના ખભે હાથ મૂકીને, ડૉલી સાથે દોસ્તી કરવાનો પ્રયત્ન તો, સુશ્રી શ્વેતાબહેન તિવારી બહેને પણ કરી જોયો, પણ સાલુ, કહે છેનેકે, માણસનો ભૂતકાળ તેનો પીછો ક્યારેય નથી છોડતો?  તે મુજબ,  પૂર્વ પતિ રાજાબાબુ ચૌધરીજીએ, ડૉલી સાથે, અનુજ સક્સેનાની પાર્ટીમાં ( ના ઓળખ્યા? પેલા મૈં કુસુમવાળા) અગાઉ  કરેલી બદતમીઝીને કારણે, ડૉલીએ, ત્રાડ સાથે સુશ્રીશ્વેતાબહેન તિવારીબહેનનો હાથ ઝાટકીને, દોસ્તીનો પ્રસ્તાવ ધરાર ઠૂકરાવી દીધો.

જોકે, સુશ્રીશ્વેતાબહેને, દોસ્તીની દ્રાક્ષ ખાટી હોવાનું જાહેર કરીને, પોતાની આબરૂ બચાવવાનો, દયામણો પ્રયત્ન કર્યો તે, મને તો બહુ  ગમ્યો..!!

ભાઈ પાઠકશ્રી, શ્રીમનોજભાઈ તિવારીભાઈનો સવાલ સાવ સાચો છે," ઐસા કહીં હોતા હૈ ક્યા? "  મનેય ઘણુંજ દુઃખ થાય છે?  એયને, બિહારના અંતરિયાળ ગામડાની કેટલી, અદભૂત અને અઢળક તિલસ્મી વાતોથી તમામ, પ્રતિસ્પર્ધીઓને અવગત કરાવવાની, મહેચ્છા તો અત્યારે સદગત જ થઈ ગઈ કહેવાયને?

આ  મહાબલી ખલીભાઈએ  પણ  ફક્ત એકવાર વાંસળી વગાડી તે વગાડી, હવે, તે વાંસળીની સાથે આટલો સમર્થ ફ્લ્યૂટવાદક ના જાણે ક્યાં ખોવાઈ ગયો?

આ બધા કકળાટમાં, આપણા જેવા મહાન સંગીતપ્રેમીઓને હવે સુરમયી વાંસળીવાદન દ્વારા, મહાબલી ખલીએ, શોધેલા નવા-નવા રાગ તો  સાંભળવા નહીંજ મળવાનાને?  તો શું આપણે, ઉસ્તાદ શ્રીહરિપ્રસાદ ચૌરસિયાજીના એકના એક, ચવાઈ ગયેલા રાગ સાંભળ્યા કરવાના? કોઈ શ..શ..શ..શ...શાહરૂખખાનને પૂછો તો ખરા, શું ડીશ ટીવીની વીશ, આપણે આટલા માટે કરીએ છે?

જો બીગબૉસ હાઉસમાં, આવો કકળાટજ ઘાલવો`તો,  તોપછી,  શ્રીબંટીભાઈ મહાચોરભાઈને, જવાજ શું કામ દીધા, અંદર પુરી રાખવા હતાને? આવું કરાય?  ચોરની ભાષા અને  તેમના કુશળ  કરતબના, આપણા જ્ઞાનમાં અસહ્ય  વધારો થાત અને  બીગબૉસનું પણ પાણી મપાઈ જાત?

પણ, ના...!! આતો બંટીભાઈ ચોરભાઈએ, બીગબૉસને જેવું શ્વસ્તીવંદના કરવાનું (ગંદીગાળો દેવાનું) શરૂં કર્યું તેમાં તો, બીગબોસની કાછડી ઢીલી  થઈ ગઈ?


હું  તો કહું  છું, મહાબલી ખલી કુસ્તીમાં ભલે વર્લ્ડ ચેમ્પિયન હોય, પણ અહીં જે  રીતે ડૉલીના આવ્યા પછી કસરત કરવાનું પણ ભૂલી ગયા છે? ( હા યાર, કોની જોડે લઢવાનું, માથાભારે ડૉલી સાથે? નૉ,વૅ મેન..!!) તે જોતાં, મને એમ થાય છેકે, જો  મહાચોરભાઈ શ્રીબંટીભાઈ અત્યારે હાજર હોત તો?

આ..હા..હા..હા..!! મારાં સ્વપ્ન ફરીથી, ચારે કળાએ ખીલી ઉઠ્યાં છે. ડૉલીબહેન બીંન્દ્રાબહેન અને બંટીભાઈ, સામસામે હોત તો પણ અને એકજ પક્ષમાં હોત તોપણ B.B.S.4ના હવે પછીના, તમામ ઍપિસોડ, મારાં સ્વપ્નની માફકજ, સોળેકળાએ ખીલી ઉઠ્યા ના હોત? (જોકે, બંને એકજ પક્ષે હોવાની શક્યતા વધારે હોત એમ, તો પાછી ડૉલી ડેઢ  શાણી છે?)   

જોકે, અમારા ચંપક જાસૂસે આપેલા, આનંદના, એક ખાનગી સમાચાર કહી દઉં, B.B.S.4માં, આજે સારાખાન પાછી આવી ગઈ, હવે  વાઈલ્ડ કાર્ડ ઍન્ટ્રીથી તેનો બોયફ્રેંડ ( હા, સારાખાને, પેલા ફોટા ફાડ્યા તેમાં હતો, તેજ.) અલી મરચન્ટ, દાખલ થાય તેવી અફવા છે. ઉપરાંત રાજા ચૌધરી અને તેની સાથે (ઈમોશનલ અત્યાચારમાં લૉયલ્ટી ટેસ્ટ દરમિયાન ઝઘડેલી) ગર્લફ્રેંડ શ્રદ્ધા શર્મા પણ, B.B.S.4માં, આપણી દિવાળી અને બેસતું વર્ષ સુધારવા આવી રહ્યાની વાટાઘાટ ચાલતી હોવાના સમાચાર છે.

જો, આ બધા સમાચાર સાચા ન  હોય તો? તો કાંઈ નહીં..!!  B.B.S.4માં ખાસડિયાં કુતરાંની માફક, બટકુ રોટલા માટે ઝઘડતા પ્રતિસ્પર્ધીઓને, આજે કુતરાનાં રોલમાં નિહાળીને મનોરંજન મેળવીશું, બીજુ શું વળી?


બાકી મને તો, લાગે છે, B.B.S.4 , વાઈલ્ડ કાર્ડ ઍન્ટ્રી દ્વારા, આવા છાપેલાં કાટલાંને, દાખલ કરીને, ચોવીસે કલાક અને બારે મહિના સતત ચાલવો જોઈએ.. બસ મઝાજ મઝા, અને બારે મહિના મનોરંજનની દિવાળી, ખરુંને?

જોકે, મને એક સવાલનો જવાબ નથી મળતો, આપ આપી શકશો?


સવાલ છે, આવી બધી મનોરંજન પ્રવૃત્તિના કાર્યક્રમોની ભરમારમાં, સાધુ-બાવાઓ કે યોગગુરુઓની આસ્થાથી લઈને એવી બધી ધાર્મિક ચેનલો કોણ જોતું હશે?

માર્કંડ દવે. તાઃ૦૨ -નવેમ્બર ૨૦૧૦.

2 comments:

  1. मार्कंडભાઇ ગઈ કાલે બિગબોસ જોતા જોતા જ તમે જે પોસ્ટ મા લખ્યુ છે તેવા વિચાર મન મા ઉદભવ્યા અને એક વખત વાચેલી જુની બિગબોસ ની પોસ્ટ યાદ આવી પાક્કિ નથી ખબર પણ મને લાગે છે તે પણ મે આ બ્લોગ પર જ વાચેલી.
    ખેર કદાચ હુ પોસ્ટ લખેત્ત તો તમારી પોસ્ટ જેટલી અસરકારક કદાચ ના બનેત્ત.

    જે કહો તે મને બોવ ખ્યાલ નથી કે બન્ટીભાઇ કેવાક બાધુકડા હતા પણ.......... શુ લાગે છે કે ડોલી ને કોઇ ડોલાવી શકશે?

    વીણા ની તો વાત જ જવાદો....અત્યારે અસ્મિત ને તો જલ્સા છે બાપુ.

    ReplyDelete
  2. પ્રિય શ્રીમાધવભાઈ,

    આપનો ખૂબ આભાર,

    મને લાગે છેકે, અસ્મિતને જલ્સા હરગિજ નથી, અત્યારે જે પ્રેમ પકરણ ઉભા થઈ રહ્યાં છેતે માત્ર અને માત્ર બીગબૉસ હાઉસમાં અવનવી કન્ટ્રોવર્સી ઉભી કરીને તેની સતત મઝા દર્શકોને મળે અને તેઓ જેતે પ્રતિસ્પર્શીઓને પોતાના મનોરંજન માટે વૉટ કરીને, તેમને અંદર હાઉસમાં ટકાવી રાખે તે માટેના ઉધામા છે.

    માર્કંડ દવે

    ReplyDelete

વરિષ્ઠ કલાકારોના સન્માન સમારંભની કેટલીક યાદગાર ક્ષણો.