Saturday, November 6, 2010

પડતર સ્વપ્નાંધતા


પડતર સ્વપ્નાંધતા


" સ્વપ્નાંધતાનો  દિન પડતર થૈ ગયો..!!
  જાગી નિહાળ્યો રવિ , નડતર થૈ ગયો..!!"


==========

દિપાવલી હાઈકુ
 
  ભાર્યા પૂછે, શું
ખાશો આજે?મેં કહ્યું,
  મે`માન લાવ..!!

  પધારો લક્ષ્મી,
મમ આંગણે, વિષ્ણુ..!!

  એ વળી કોણ?
  
     વાલમ ફોડે,

બોમ્બ? હરખું, ત્યાંતો   
  બોલ્યા, `તું  ફોડ..!!`

   દિવાળીને શું?
આવેને જાય, ચાલ,
 ઘાણીએ  બાંધ..!!
 
   દિવાળી દીપ
જલે, ને અંધારે આ
   દિલ જલતું..!!   
 
==========

"જુવો, અત્યારથી કહી દઉં છું,હા..!! આવતીકાલે નવા વર્ષનો પડતર દિવસ છે, પણ તમે વહેલા ઉઠીને નાહીધોઈ લેજો, ભૈશાબ..!! પછી મને પરવારતાં બપોરના બાર-એક વાગી જાય છે..!! બપોરે બજારમાંય જવાનું છેને? " દિવાળીની મોડી રાત્રે, ફટાકડાઓના કાન ફાડી નાખતા અવાજો વચ્ચે, પત્ની નામનો બોમ્બ, આદેશના સ્વરમા ફાટ્યો, તે સાથેજ હું સુરસુરિયું થઈ ગયો.

પંચાંગ રચનારાઓની આ તે કાંઈરીત છે? આવી અંચાઈ કરે તે  ચાલે? પડતર દિવસ શાનો? કેમ દિવાળી પછી બીજા દિવસે બેસતું વર્ષ ના આવે? આવા હજારો સવાલનાં રોકેટ ઉડાડતો-ઉડાડતો હું,  જાતજાતનાં સ્વપ્નમાં સરી પડ્યો..!!

સ્વપ્નમાં, મને, કોઈ ધાર્મિક ચેનલના સાધુમહારાજ પડતર દિવસના નડતરની કથા સમજાવવાનો પ્રયત્ન કરી રહ્યા હતા, પણ જાણે આ કથાયજ્ઞમાં, કોઈ લૅડી રાવણ, `હા..હા..હા..હા..!!` અટ્ટહાસ્ય કરીને હવનમાં હાડકાં નાંખતી હોય તેવો ભાસ થયો. મને તેનો ચહેરો ડૉલી બિંન્દ્રા જેવોજ લાગ્યો? મને થયું વચ્ચે-વચ્ચે, આપમેળેજ ચેનલ બદલાતી હોય તેમ લાગે છે? મેં રીમોટ શોધવા પથારીમાં હાથ ફેરવ્યો, તો મારા પાયજામાનું નાડું હાથ આવ્યું હોય તેમ લાગ્યું..!! શરમનો માર્યો, હું ભરઊંઘમાંજ બબડ્યો,`છોડ,યાર..!! આજે નહીં, પડતર દિવસ છે?`

જોકે, મહારાજ ફરી શરૂ થઈ ગયા," ગ્રહોની દિશા અને દશાને કારણે, આ પડતર દિવસ ક્યારેક આવે છે..!!"  લૅડીરાવણ, `હા..હા..હા..હા..!!`

" પડતર દિવસે પૂર્વ તરફ મુખ રાખીને, જો સુર્યને સવારે જળનો અર્ઘ્ય આપવામાં આવે તો..!!" , `હા..હા..હા..હા..!!`

" પડતર દિવસે, દાન-પૂન્યનો અપાર મહિમા છે..!!", `હા..હા..હા..હા..!!`

" પડતર દિવસે જો..!!" `હા..હા..હા..હા..!!`

" પડતર..!!" `હા..હા..હા..હા..!!`

" પ....!!  `હા..હા..હા..હા..!!`

કંટાળીને ઊંઘમાં, હું  જાણેકે, પડખું ફર્યો હોય તેમ મને ભાસ થયો.

હવે સીન બદલાયો, પડતર દિવસે હું વહેલો ઉઠીને, બાથરૂમમાંથી હજુ બહાર નીકળ્યો હશે, ત્યાં અર્ધાંગિની કહે" આજે, આમેય બજાર જવું છે,પડતર દિવસને લીધે, ભીડ નહીં હોય, બહાર હૉટલમાં જમી લઈશું?" મેં તેના ગાલ પર ટપલી મારી હકારાત્મક માથું ધૂણાવ્યું.

દસ વાગ્યા હશે ત્યાંતો, આશરે બાર જેટલા મિત્રો તેમની પત્નીઓ સાથે આવી ગયા..!! પાછાં કહે, `કાલે સમય મળે ના મળે, થયુંકે, આજે પડતર દિવસ છે, મળી આવીએ, કાલે અમે બધાં ગોવાની ટૂર પર જઈએ છે..!!  ભા...ભી..ઈ..ઈ.., શું બનાવશો? આજેતો  તમારા હાથનુંજ જમવું છે..!!`

મેં, મારી અર્ધાંગિનીને, ચિંતા નહીં કરવા, ઈશારો કર્યો. તરત એક મિત્રને સાથે લઈને, સારામાં સારા પ્રખ્યાત રેસ્ટોરન્ટમાંથી, પંજાબી, ચાઈનીઝ, થાઈ વિગેરે, જેને જે ભાવતું હતું, તે પૅક કરાવી લાવીને, બધાય મિત્રોને,`અતિથિ દેવો ભવ` સમજીને,પ્રેમથી આગ્રહપૂર્વક જમાડીને, રાજીના રેડ કરી દીધા.બધા સારી પેઠે જમીને, રવાના થયા ત્યારે બપોરના ચાર વાગી ગયા હતા.

છેવટે, હું અને મારી ભાર્યા  હવે, બજારમાં ટહેલતાં હતાં. ભાર્યા સાથે, સોનાચાંદીની દુકાનો સામે નજર નહી નાંખવાની, શરત કરીને  નીકળ્યો હોવા છતાંય,  ભાર્યા ત્રાંસી આંખે, લોલુપ નજરે હીરાનો એક નેકલેસ જોતી હતી તે જોઈને, મેં ભાવ પૂછતાં જાણ થઈકે, તે હાર રૂપિયા દોઢ લાખની કિંમતનો હતો. જોકે, ભાર્યા ના..ના.., કરતી રહી છતાંય તેને, આ મોંઘો હાર, મારા ગળાના સોગન દઈને, મેં અપાવીજ દીધો..!!

ભાર્યાના ચહેરા પરનો આનંદ નિહાળી, મારા રૂપિયા જાણેકે, વસૂલ થઈ ગયા. અમે આગળ વધ્યા.પછીતો, પત્ની મને ના..ના.. કહેતી રહી અને, કેશ-ક્રેડિત કાર્ડ, ઍટીએમ કાર્ડ જે મળ્યું, તેનાથી રૂપિયાની વ્યવસ્થા કરીને, મોંઘીદાટ સાડીઓ, બ્લાઉઝ પીસ, નાઈટ ગાઉન, હીરા જડીત હેરપીન, બક્કલ, રીબીન, કાંસકા.., વિગેરે, માગે તોય અને ના માગે તોય ખરીદી આપીને, તેને ખુશ-ખુશ કરી દીધી.

ત્યાંથી અમે, સીધાજ, આમંત્રણ હોવાથી, સારાખાન અને અલીમરચન્ટના લગ્નની વધામણી આપવા બીગબૉસહાઉસમાં હાજર થઈ ગયાં.

જોયુંતો, મારી મિસિસના ગળામાં શોભતા, હમણાંજ ખરીદેલા,રૂપિયા દોઢલાખના હારનાં વખાણ, શ્વેતા તિવારી કરતી હતી, તે જોઈ મારી છાતી ગજગજ ફૂલી ગઈ.જોકે, ડાકુરાણી સીમાની નજર મને ઠીક ના લાગી.

બીગબૉસ હાઉસમાં, મહાબલી ખલીની સાથે સારીપેઠે જમ્યાબાદ, લગ્નની ભેટ (ચાંલ્લો) નોંધાવવા, ગજવામાં હાથ નાં ખ્યો, ત્યારે જાણ થઈકે, આજે ભારે ખરીદીને કારણે, મારું ગજવું તો સાવ ખાલીખમ થઈ ગયું હતું..!!

છેવટે, ચાંલ્લો નહીં નોંધાવાને કારણે, બીગબોસ હાઉસના નિયમ પ્રમાણે, તેના  તમામ પ્રતિયોગીઓનાં એઠાં વાસણ અમે બંનેએ, ધોયાં પછીજ, તેમના બાઉન્સરોએ અમને, તાળુ ઉઘાડીને બહાર નીકળવા દીધાં..!!

જોકે, હું આ અપમાન પણ ગળી ગયો, અમે પતિ-પત્ની, થાકીને, ઘેર પાછા વળ્યાં. ત્યારે રાત થઈ ગઈ હતી. ઘેર પહોંચતાંજ, ટુંટિયું વાળીને હું સૂઈ ગયો.

=========

સવાર થતાંજ, મારી આંખ  ખુલી ત્યારે, મારી ભાર્યાને મેં, સાલમુબારક કહ્યું, તો કહે,` આજે શેનું સાલમુબારક? આજે તો પડતર દિવસ છે..!!"

ઓત્તારી..!! ઉપર જણાવેલી બધી કથા, નારદજી અને સુદામાજીને આવેલા સ્વપ્નસમી સાવ બનાવટી હતી?

હું પૂર્ણરૂપે જાગીને, ઘરતી પર આવી ગયો. નાહી ધોઈને તૈયાર થયો, ત્યાંતો, આ, શું? દસ વાગ્યા હશેને, જાણે સ્વપ્ન સાચું પડતું હોય તેમ, આશરે બાર જેટલા મિત્રો તેમની ભાર્યાઓ સાથે આવી ગયા..!! પાછાં કહે, `કાલે સમય મળે ના મળે, થયુંકે, આજે પડતર દિવસ છે, મળી આવીએ, કાલે અમે બધાં ગોવાની ટૂર પર જઈએ છે..!!  ભા...ભી..ઈ..ઈ.., શું બનાવશો? આજેતો  તમારા હાથનુંજ જમવું છે..!!`

થયું? દબાતા અવાજે, ભાર્યાએ મને પૂછ્યું, " ઝટપટ શું જમવાનું બનાવું? તમે શું ખાશો?"

મેં કહ્યું," તાસકમાં આ મહેમાનોને પીરસી લાવ..!!"

જેમતેમ, શીખંડ, પૂરીશાક, અથાણાં, ચટણી,પાપડ, મઠીયાં-ચોળાફળી, વિગેરે જમાડીને બધાને વિદાય કર્યા ત્યારે,બપોરના ચાર વાગી ગયા હતા.

બજારમાં જવાની આશાએ, મારી ભાર્યાએ, મને પ્રેમથી કહ્યું," કાલેતો રાત્રે મને એટલું સરસ સ્વપ્ન આવ્યુંનેકે, હું ના..ના.. કરતી રહી, છતાંય તમે મને, દોઢ લાખ રૂપિયાનો, મોંઘો હીરાનો હાર, પ્રેમથી ખરીદી આપ્યો..!! તમે તૈયાર થઈ જાવ, આપણને બજારમાં જવાનું મોડું થાય છે..!!"

ટીવીની ચેનલો ફેરવતાં-ફેરવતાં થોભીને, મોંઢું બગાડીને, હું તાડુક્યો," બેસ-બેસ છાનીમાની, ત્યાંથી પછી બીગબૉસ હાઉસમાં, લોકોનાં એઠાં વાસણ ધોવા જવું છે?"

બાપડી મારી ભાર્યા..!!  મારા અચાનક હુમલાથી મારી વાતને સમજ્યા વગરજ, ડઘાઈને  સાવ લેવાઈ ગઈ.

એટલામા, ટીવીમાં એક જટાધારી બાવાજી પણ જોરથી બરાડ્યા, " આજે પડતર દિવસ, આજે સોના-ચાંદી-હીરા-મોતી ખરીદી માટે શાસ્ત્રોમાં નિષેધ છે."

આ સાંભળીને, ભાર્યા માની ગયાં, " કશો વાંધો નહી? આપણે કાલે જઈશું?"

મેં કહ્યું, "કાલની વાત કાલે..!!"

હાશ..!! મને થયું, પડતર દિવસેય, ધર્માંધતા ફેલાવતી આવી ધાર્મિક ચેનલો, આપણને, કામ લાગે છે ખરી..!!

જોકે, મને એક વિચાર આવે છેકે, ધર્માંધતા સામે જનજાગૃતિ માટે, સરકાર અને સ્વૈચ્છિક સેવાભાવી સંસ્થાઓ ઉમદા કાર્ય કરે છે, તેની ના નહીં, પરંતુ 
સ્વપ્નાંધતા સામે, નિંદ્રાજાગૃતિ માટે,  સરકાર અને સ્વૈચ્છિક સેવાભાવી સંસ્થાઓ શું કરવા ઈચ્છે છે, તે બાબતે કોઈ વિદ્વાન મિત્ર મને ગાઈડ કરશે?

હીરાનો હાર પોસાય, પણ તમારા આ મિત્ર દંપતિ,(અમો બંને) બીગબોસ હાઉસમાં લોકોનાં એઠાં વાસણો ધોઈએ, તે તમનેય શોભે? કહો જોઉં..?

ખેર..!! જેવાં અમારાં પડતર ભાગ્ય, બીજું શુ?


માર્કંડ દવે. તા.૦૬ નવેમ્બર ૨૦૧૦.

1 comment:

  1. શ્રી માર્કંડભાઈ,

    આપને તેમજ આપના પરિવારને દિપાવલી અને નૂતન વર્ષના હાર્દિક અભિનંદન ... નૂતન વર્ષ સૌને ફળદાયી- આરોગ્યદાયી- જ્ઞાનદાયી બની રહે તેવી પ્રભુ પ્રાર્થના...

    અશોકકુમાર-'દાસ'
    http://das.desais.net

    ReplyDelete

વરિષ્ઠ કલાકારોના સન્માન સમારંભની કેટલીક યાદગાર ક્ષણો.