Tuesday, October 18, 2011

પતંગિયું. (ગીત)



પતંગિયું. (ગીત)




ભૂલથી  મેં   એક,  પતંગિયું  પકડ્યું, 

 કોપિત ચમન, આખેઆખું ગરજ્યું..!!

ઝાકળ   ઘસી તેજ  થૈ,  તેગ  શૂળની, 

ભોંકાય   ભીતર,  મન  મારું   કણસ્યું.


અંતરા-૧.

સુવાસ   રીસાઈ,  કુમાશ  ખીજાઈ,

પાંદડી  સુકી  તો,વળી પાછળ પડી,

ભરમાતાં, ડરતાં, રડતાંને સરતાં, 

કુસુમ અશ્રુ જોઈ, ઉર મારું કણસ્યું.

ભૂલથી મેં એક,પતંગિયું  પકડ્યું..!!

અંતરા-૨.

હચમચ્યાં મૂળને, ડાળીઓ તમતમે,

પંજા  ફેલાવી  થોર, મારવા ધસે,

ગર્જન પ્રચંડ,ધમધમાટ રોષ  જોઈ, 

ભય  કેરું  લખલખું, રોમ-રોમ ફરક્યું.

ભૂલથી મેં એક, પતંગિયું  પકડ્યું..!!

અંતરા-૩.

ભમરાઓ  ચટકે, રજપરાગ  ચીખે,

સુણીને  ઘોંઘાટ, સહુ મધમાંખ ધખે, 

ચહુ  કોર  ઘેર્યો,  ડંખ્યો  મને  દંડ્યો,

જાગી  વેદના  તૈં, મન મારું સમજ્યું,   

ભૂલથી  મેં એક, પતંગિયું  પકડ્યું..!!

અંતરા-૪.

ભયભીત થૈ ને, પલ-પલ વિલયતું,

હારી - થાકી અંતે, શાંત થઈ  જાતું,

છૂટવાને   કાજે,  તરફડતું,  ફફડતું,  

કકળાટ  જોઈને,  દિલ મારું  કકળ્યું.

ભૂલથી મેં  એક, પતંગિયું  પકડ્યું..!!

© માર્કંડ દવે. તા.૧૭-૧૦-૨૦૧૧.

1 comment:

  1. ભુલથી મેં એક પંતગીયું પકડ્યું...સુંદર અભિવ્યક્તિ રૂપે કાવ્ય સરી પડ્યું છે..

    ReplyDelete

વરિષ્ઠ કલાકારોના સન્માન સમારંભની કેટલીક યાદગાર ક્ષણો.