માનવીના જીવનમાં, મહત્વનો સવાલ એ હોય છેકે, આપણા શરીરના પ્રત્યેક કણ-કણમાં વસતી અને સંસારની પ્રથમ ગુરુ એવી પૂજનીય આપણી માતાનું ૠણ આપણે ક્યારેય ચૂકવી શકીએ ખરા? શું કોઈ સંસારમાં કોઈ એક એવો શબ્દ પણ છે,જે માતાની યથાર્થ સ્વરૂપે સ્તુતિ કરવા માટે સમર્થ હોય?
આપણા જીવન ઘડતરમાં માતાના યોગદાન અંગે,ચર્ચા સમયે, એક અજાણ્યા સંતને કોઈ સચોટ ઉદાહરણ દર્શાવવાની વિનંતી કરતાં તેઓએ,મને અનાયાસ એક ઉમદા ઉદાહરણ દર્શાવ્યું. સંતે મને કહ્યું, "પોતાના બાળકને સ્તનપાન કરાવતી વેળાએ, માં પોતાના બાળકના ચહેરા પર પોતાની સાડીના પાલવનો છેડો ઓઢાડીને તેને "કૂકડી કૂક" જેવા અવાજ સાથે, સંતાકૂકડીની રમત રમાડતી હોય છે,તેની પાછળનો શુભાશય એ છેકે,"બેટા, કાલે ઉઠીને હું હોઉં કે ન હોઉં..!! પણ આ અજ્ઞાનના અંધારાથી ભરેલા, આ વ્યર્થ સંસારમાં, અત્યારથી જ તું તારો પ્રકાશમય માર્ગ જાતે શોધતાં શીખી જા..!!"
જોકે, તેથીજ તો સંસારમાં માતાને, બાળકની પ્રથમ ગુરુ હોવાનું ગૌરવ પ્રાપ્ત થયું છે.
